Mahal Kita, Aking Ama
Kenn John Soltones
Nang unang minulat aking mga mata
Ni anino’y di man lang nakita
Lumaki akong balot ng lungkot
May kulang sa pusong may sigalot .
Larawang tangan silbing patunay,
Na ikaw sakin nagbigay buhay,
Kaya’t taon man sa’tin dumaan,
Ako’y makikipagsapalaran.
Noong magtapos ng kolehiyo,
Kita’y di kasama pagpanhik ko,
Ngunit ano man naging tagumpay,
Pasasalamat sa iyo alay.
Tadhana ba’ng makapagsasabi
Mayayakap, pagtulog katabi?
Saba’y sambit matagal nang dala,
Kataga – “Mahal kita, aking Ama.”
